انصار:( د تله ۱۳مه)، د افغانستان لپاره د روسیې د ولسمشر ځانګړي استازي ضمیر کابلوف د مسکو فارمټ د تېرې غونډې د پریکړه لیک جوړیدو پر مهال د دغه پریکړه لیک له ځینو ټکیو سره د تاجکستان د حکومت له مخالفت څخه پرده پورته کړه.
نوموړي د روسیې ځینو رسنیو ته ویلي، چې تاجکستاني استازي د پریکړه لیک له دوو مادو سره، چې د داعش او نیشه یي توکیو خلاف د طالبانو د مبارزې ستاینه پکې شوې وه، مخالفت وکړ.کابلوف زیاتوي: د تاجکستان استازي وویل، طالبان د ستاینې وړ داسې څه نه لري.
روسي استازي دا هم ویلي، چې له دې سره هم د غونډې د نورو ګډونوالو د رایو په اکثریت یاد شوی پریکړه لیک او ټولې مادې یې تایید او صادر شوې.
تاجکستان د طالبانو له رژیم سره د دوی د تېرې او اوسنۍ واکمنۍ دواړو پر مهال مخالفت لرلی.
دغه هېواد د طالبانو د تېرې واکمنۍ پر مهال د طالبانو له مخالف قومندان احمد شاه مسعود څخه ملاتړ کاوه او اوس یې د هغه زوی احمد مسعود ته په دوشنبه کې دفترونه او پناه ځایونه ورکړي، چې د طالبانو خلاف وسله وال فعالیتونه پکې سمبالوي.
د طالبانو یو شمېر چارواکو د خپلې اوسنۍ واکمنۍ په لومړیو میاشتو کې تاجکستان ته د برید خبرداری ورکړی و.
URL تعقيب: https://www.ansarpress.com/pashto/27481
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني